Europako sindikatuek manifestaziora deitu dute uda osterako, Bruselan

Europako Batasuna ordezkatzen duten 27 herrialdeetako Ekonomia eta Finantza ministroek hitzordua dute irailaren 29an (Ecofin), eta bilera haren atarira eraman nahi du protesta Europako Sindikatuen Konfederazioak. Hazkunde ekonomikoan eta lanpostuetan oinarritutako estrategia eskatuko du krisiari aurre egiteko, eta murrizketa sozialen kontrako aldarria egingo du.

Konfederazioaren arabera, "oso okerrak dira"Europako gobernuek abian jarritako murrizketa planak."Hazkunde ekonomikoari eta lanpostuak sortzeari kalte egiten diote neurri horiek, eta zalantzan jartzen dute Europa krisitik ateratzeko murrizketek duten gaitasuna".

Europa osoan kanpainari ekingo dio sindikatuen elkarteak, eta horrekin batera deitu du irailaren 29ko "mobilizazio handira". Tokian tokiko sindikatuei, berriz, dei egin die "ahalik eta protesta gehien" egin ditzaten, "grebak eta manifestazioak barne".