"Beren egunerokoari buruz hitz egitera etorri dira, senideak ikusteko egin behar izaten dituzten milaka kilometro egiteagatik jasan behar dituzten eskubide urraketak salatzera"; hala aurkeztu du Etxerat-en agerraldia EH Bilduko eurodiputatu Josu Juaristik.
Aurreko egunetan hainbat alderditako ordezkariekin bildu ostean, agerraldia egin dute Etxerat-eko kideek, sakabanaketaren ondorioak salatzeko. Bide horretan, parlamentuko taldeek agertutako elkartasuna nabarmendu eta eskertu du erakundeak. "Bidegabea da senide eta lagunok horrenbeste kilometro egin behar izatea maite ditugun pertsonak ikusi ahal izateko. Horregatik, eskertu nahi dugu ia alderdi guztietako ordezkariek agertutako elkartasuna", adierazi du Urtzi Errazkin Etxerat-eko kideak.
Erakundeari sostengua agertu diotenen artean izan dira Die Linkeko eurodiputatu Gaby Zimmer eta Sinn Feineko Martina Anderson.
Ez dira guztiak agerraldiarekin bat etorri, ordea. UPDko Maite Pagazaurtunduak gaitzetsi egin du "terrorismoaren biktimen eta hiltzaileen sufrimendua parekatu" nahi izatea.
