Bizkaiko jeltzaleen presidente Itxaso Atutxak euskal herritar guztiei igandeko ekitaldietan parte hartzeko deia egin die, EAJk berak edo gainontzeko alderdi eta eragileek antolaturikoetan. "Euskotar gizon-emakume guztiok gure nazioa aldarrikatzeko eguna da". Horregatik, ontzat jo du Ahal Dugu-k ere Donostian Aberri Eguneko ekitaldia egiteko asmoa iragarri izana.
Igandeko ekitaldiaren berri ematearekin batera, Euskal Herriko lurraldeen egoera politikoaren errepasoa egin du. EAJk Eusko Legebiltzarraren hurrengo legegintzaldian estatus politiko berriaren oinarriak finkatu nahi dituela iragarri du, "adostasun zabalenarekin". Ez du argitu hauteskundeak noiz izango diren, ez eta Espainiako Gorteak aukeratzeko bozak errepikatuko balira legebiltzarrerakoak aurreratuko liratekeen ere. "Lehendakariarena da erabakia". Nafarroan Uxue Barkosen gobernuak aurki urtea beteko duela gogoratu du, pozez. Eta esan du jeltzaleek argi dutela Nafarroa nafarrek nahi dutena izango dela. Ipar Euskal Herriari dagokionez, aitortu du elkargo bakarraren proiektuak ez dituela gogobetetzen jeltzaleen helburuak eta nahiak, baina aurrerapausotzat jo du.
Atutxak azpimarratu du jeltzaleen abertzaletasuna pertsonen zerbitzura dagoela: "Gure herriarekiko eta herritarrekiko konpromisoa esan nahi du, solidaritatean eta gizarte justizian oinarrituta, eta, zelan ez, gure kultura eta nortasuna mundu globalizatuan dauden balio giza eskainiz".
