Euskal gizartea Estatuan «behar bezala egokitzea» du xede EAJk

EAJk Espainiako Gorteetan legegintzaldi honetan izango duen helburu nagusia Espainiako Estatua «nazio askotakoa» dela onar dezatela izango da. Halaber, «euskal gizartea Estatu ereduan behar bezala egokitzea» ere lortu nahi dute. Hala adierazi zuen atzo Josu Jon Imaz EAJren EBBko presidenteak, Radio Euskadiri eskainitako elkarrizketan.

Espainiako Gorteek hartuko duen bideari dagokionez, «elkarrizketa garaiari» bide emango zaiola uste du. Horrek, baina, «gauza arrunta behar luke izan demokrazian», esan zuenez. Dena den, PSOEk izango duen jarrerarekiko zalantzak ditu Imazek, Jaurlaritzaren Estatutu proposamenaren inguruan batik bat. «Aldeko zein kontrako iritziak entzun ditugu», esan, eta «ados jar daitezela» eskatu zion PSOEri. Areago, «hitz egin dezagun gizarteari interesatzen zaionaz: edukiei eta arazoen konponbideei buruz», adierazi zuen.EAJk aurrerantzean EArekin eta EB-IUrekin elkarlanean jarraitzeko asmoa duela ere berretsi zuen Imazek. Nolanahi ere, «Euskadiko autogobernuaren inguruko akordioetan bide bazterrean inor ez geratzearen alde» dagoela azaldu zuen, PSE-EEri buruz ari zela.