"Euskal Herrian gatazkaren konponketa sustatzeko" asmoz, Nazioarteko Konferentzia egingo dute datorren astelehenean Donostian, nazioarteko eta bertako hainbat erakundek bultzatuta, gaur arratsaldean Lokarri akordioaren eta kontsultaren aldeko herritarren sareak prentsa ohar batez jakinarazi duenez. Bihar izango da konferentziaren aurkezpena, Donostian, Bakearen Etxean.
Hain zuzen ere, hauek dira ekimenaren sustatzaileak: Berghof Foundation, Conciliation Resources, The Desmond and Leah Tutu Legacy Foundation, Harremanetarako Nazioarteko Taldea (Euskal Herria) eta Lokarri bera.
Biharko aurkezpena Paul Rios Lokarriko ordezkariak, Pierre Hazan Harremanetarako Nazioarteko Taldeko kideak eta Jonathan Powell Erresuma Batuko lehen ministroaren kabineteko buru ohiak egingo dute. Era berean, Lokarrik dioenez, Nazioarteko Konferentziari sostengua emango dioten hainbat euskal herritar esanguratsu izango dira.
