Ricard Salomek 120 Horas. La tortura contra Euskal Herria dokumentala bukatzeko behar zuen dirua lortu du. Zuzendari katalanak 4.500 euro behar zituen Euskal Herriko tortura kasuei buruzko dokumentala bukatzeko; eta, guztira, 4.778 euro lortu ditu, herritarrek crowfounding bidez eginiko ekarpenei esker.
Dokumentalaren izenak atxilotuek inkomunikatuta pasatzen duten denboran du oinarria. Salomek, dokumental horren bitartez, "Espainiako Estatuak Euskal Herriaren eta euskal herritarren aurka egiten dituen torturak" salatu nahi ditu. Horretarako hainbat laguni egindako elkarrizketak bilduko ditu dokumentalak. Tartean dira, besteak beste, Torturaren Aurkako Taldeko Lorea Bilbao eta Ane Ituiño, Oihana Barrios psikologoa, Amaia Izko abokatua eta torturak jasan dituzten Unai Romano, Mikel Soto, Anabel Prieto, Martxelo Otamendi, Amaia Elkano, Ainara Vaquerano eta Xabier Beortegi. Trailerra ikusgai dago.
