Gaur goizean, Etxerat-eko kideek Hernaniko egoitzaren hormak eta kristalak itsasgarriz "josita” aurkitu dituzte: “Gure senide eta lagunentzako 'hilobi komun' baten aldarrikapena irakur zitekeen”. Elkarteari “azken garaietan jazarpen kanpaina larria” egiten ari zaizkiola salatu dute, eta Jone Artolaren auzia jarri dute horren adibide nagusi moduan.
Artola Bilboko Aste Nagusiko txupinera izendatu zuten konpartsek, eta Etxerat-eko kide izateagatik Carlos Urkijo Espainiako Gobernuaren EAEko ordezkariak izendapenaren kontrako helegitea jarri zuen, “terrorismoaren biktimak ez mintzeko”. Horren helburua “elkartea kriminalizatzea” dela salatu du Etxerat-ek, eta modu horretan alboratu nahi dutela “Gernikako Akordioaren sinatzaile bezala bakea, memoria eta justiziaren bidean” elkarteak egin duen lana. Oroitarazi du Etxerat “guztiz publikoa, zilegia eta legala” dela.
Gaurko erasoak “aurrekariak” dauzkala eta ez dela “eraso bakan hutsa” berretsi du, eta gaineratu du “edonolako eraso eta mehatxuen gainetik senide eta lagun errepresaliatuen eskubideen urraketa oro salatzen” jarraituko duela.
