Euskal presoen senideen elkarteak berak eman du gertatutakoaren berri. Espainia hegoaldera bidaia egiten du autobus horrek, hainbat espetxetan bisitak egitera doazenak eramanez.
Algecirasko kartzelan bisitak bukatuta, Puerto eta Sevillara bidean zihoan, eta espetxetik abiatu eta kilometro gutxira gertatu da erasoa, 19:00ak aldera.
Momentu horretan 11 lagun zihoazen autobusean, Etxerat-ek jakinarazi duenez. Ibilgailuaren ezker aldeko kristal bat hautsi du harrikadak. Aurrerago gelditu egin dira, kristalak garbitzeko.
Etxerat-ek azaldu duenez, kolpe handia eman du harriak, baina gidariak ez du autobusaren kontrola galdu, eta ez da inor zauritu. Datozen egunetan egingo du agerraldi bat, xehetasun gehiago eman eta balorazioa egiteko.
