Joan den astean esan zuen Espainiako Sustapen ministro Ana Pastorrek Euskal Y-a martxan izango dela 2019rako, eta adierazpen horien inguruan hitz egin du Ana Oregi Eusko Jaurlaritzako Ingurumen eta Lurralde Antolaketa sailburuak Radio Euskadin eginiko elkarrizketa batean.
Oregiren iritziz, Pastorrek emandako epea "izugarri estua" da, eta hori betetzeko, beharrezkotzat jo du inbertsioak eta "lanen kudeaketa nahiz falta diren gauzen definizioa azkartzea".
Trena Bilbo, Donostia eta Gasteizera nola sartuko den zehaztea falta da, batez ere. Horretarako, Jaurlaritzako eta hiru udaletako ordezkariek bilera bat egin nahi dute Espainiako Sustapen Ministerioarekin, eta Oregik gogoratu du Pastorrek konpromisoa azaldu duela bilera hori irailean egiteko.
Pastorrek esan zuen AHTak ez duela "atzera bueltarik", eta hitz horiekin bat etorri da Oregi. Udazkenean egitekoak diren Espainiako Gorteetarako hauteskundeen ondoren Espainiako Gobernua aldatzen bada ere, azpiegitura horri ez dio kalte egingo, Oregiren esanetan: "Ez da inola ere gertatuko [AHTa] egin gabe geratzea".
Oregiren iritziz, hala gertatzea "erabat arduragabea" litzateke, "orain arte eginiko esfortzu guztia eta gero".
