Manuel Niño Espainiako Azpiegitura idazkariak astelehenean eman zuen datua, eta Josu Erkoreka Eusko Jaurlaritzako bozeramaileak aitortu du, Niñok emandako datua baieztatuz gero, azpiegitura hori ez dela "espero bezain lehiakorra" izango.
Hala ere, Erkorekak gaineratu du Jaurlaritzak ez duela Niñok aipatutako "hipotesian" kokatu nahi: "Ez dakit nondik datorren aurreikuspen aldaketa hau, baina Jaurlaritzak hasierako aurreikuspenak babesten ditu".
Erkorekak uste du tren lasterrak hiru hiriak batzeko beharko duen denboraren kalkuluak zer ikusia duela hirietara sartzeko modua erabakitzearekin: "Trenaren abiadura eta hirien arteko distantzia jakinez gero, kalkulua nahikoa erraza da; eragiketa matematiko bat da".
Lanak eteteko eskea
Niñok datua eman eta biharamunean, EH Bilduk eskatu du bertan behera utz daitezela abiadura handiko trena eraikitzeko lanak, argudiatuz "apenas" aurreztuko litzatekeela Bilbo, Gasteiz eta Donostia arteko denbora. Koalizioak nabarmendu du "gero eta argiago" dagoela AHTak ez diola "interes sozialari erantzuten, eraikitzaile handien interes ekonomikoei baizik".
