Euskal Y-a finantzatzeko, mila milioi euroko mailegua egingo du EIB Europako Inbertsio Bankuak. Espainiako Sustapen Ministerioak eman du maileguaren berri, gaur. Guztira, mila milioi euro jarriko ditu EIBk, baina mailegu osoaren erdia aurreratuko du orain, 500 milioi euro, kreditu lerro baten bidez.
Espainiarentzat bezainbeste Europarentzat, "inbertsio garrantzitsua" da EIBk egingo duena, Ana Pastor Sustapen ministroaren esanetan, Europaz gaindiko sarearen parte delako tren laster hori. Madrilen eta Bilbo, Gasteiz eta Donostiaren arteko loturak erraztuko ditu trenak, baita Espainia eta Europaren artekoak ere, Pastorren esanetan.
Pastorrek berak, Enrique Verdeguer ADIFeko presidenteak eta Magdalena Alvarez EIBko presidenteordeak sinatu dute maileguaren hitzarmena. Espainiak 30 urtean itzuli beharko du mailegua. ADIFek interes tipoak aukeratu ahal izango dituela adierazi dute aurkezpenean.
