Aurreko ikasturtean 12.000 lagunetik gora ibili ziren AEKren euskaltegietan euskara ikasten. Aurten gehiago izango diren esperantza agertu du Mertxe Mugika koordinatzaileak. Horretarako, matrikulazio kanpaina ipini dute martxan, %100 afektiboa lelopean. "AEK-k euskara ikasteko eta lantzeko aukerarik onena eskaintzen dio jendeari; gurean, euskara ikasteko modu afektiboa aurkituko du", azaldu du. Erabileran oinarritutako metodologia aintzat hartuta, "bizi esperientzia aparta" biziko dutela iragarri die matrikulatzeko asmotan direnei.
Deustuko Unibertsitateko irakasle Jone Goirigolzarrik egindako dekalogoa ere ahotan ibili dute gaur goizean egindako aurkezpenean. Goirigolzarrik berak azaldu ditu hamar puntuak. Besteak beste, azaldu du euskara gehiago erabiltzeko jarrera proaktiboa izan behar dela.
Mugikak gogora ekarri du erakunde publikoek diru laguntzak ematen dituztela. Horri buruzko informazioa eta AEK-k eskaintzen dituen zerbitzuen ingurukoa euren webgunean ipini dute eskura.
Urtero berrikuntzak egitea gustuko dutela esan du. Aurtengoan, hiru euskaltegi berri izango dira. Irailaren 13an inauguratuko dute Andoaingoa (Gipuzkoa); 15ean Lekunberrikoa (Nafarroa); eta 26an Urnietakoa (Gipuzkoa).
