Maider Arostegi Miarritzeko (Lapurdi) auzapez berriak prentsaurrekoa egin du goizean, ondoko sei urteetan hiria gidatuko duen udal taldea aurkezteko. Hamahiru auzapezorde izanen ditu inguruan. Lehena Adrien Boudousse izanen da, politikari hasiberri bat: gizarte politika izanen da haren ardura. Euskararen aldeko hizkuntza politika Anne Pinatelen esku izanen da; kulturaren, giza baliabideen eta gerlari ohien ardura ere izanen du.
Azken urteetan, hizkuntza politikan indar gehien egin duten hirietako bat izan da Miarritze. Arostegik horrekin segitzeko asmoa erakutsi du: «Euskarak leku osoa izanen du Miarritzen, orain arteko baliabide berekin», adierazi du. Pinatelek ez du adierazpenik egin nahi izan: taldea martxan izanen delarik mintzatuko dela erran du.
Gaurko prentsaurrekoa, gainera, legealdian auzapezak izanen dituen lehentasunak aipatzeko momentua ere izan da. Hiriaren segurtasuna eta baretasuna izan dira Arostegiren ahotan entzun diren gai nagusiak. Azaldu du diskotekak itxiak egoteak jendea karrikan edatera bultzatu duela, eta horrek arazoak sortu dituela azkenaldian. Diskotekak berriz irekitzeko erabakia prefetarena da; «konponbide bat atzeman beharko da», adierazi du Arostegik. COVID-19ak sortutako osasun krisiaren ondotik, suspertze ekonomikoa bultzatu nahi du turismo eta ostatu arloan, jakinarazi duenez.
Herriko bozen bigarren itzulian botoen %31,46 eskuratu zituen Arostegi eskuineko hautagaiak, eta, hala, Michel Veunac Modem alderdiko auzapez ohiaren lekua hartuko du. Miarritzeko herritarren %59,43 ez ziren bozkatzera joan ekainaren 28an.
