Euskararen datuak eta geroa aztergai Udako Ikastaroetan

Euskal Herriko Unibertsitateko Udako Ikastaroetan, euskararen egoerari buruz gogoeta egiteko mintegi bat antolatu dute Eusko Jaurlaritzako Hizkuntza Politikarako Sailburuordetzak eta Soziolinguistika Klusterrak. Bihar eta etzi egingo dituzte saioak, Donostiako Miramar jauregian. V. Inkesta Soziolinguistikoa eta Hizkuntzen Kale Erabileraren VI. Neurketa hartuko dituzte gogoetarako oinarri; biak iaz eginak dira. Bihar, Olatz Altunak, Jon Aizpuruak eta Agurtzane Ortiz de Landaluzek xehatuko dituzte datuak. Asteartean, berriz, Iñaki Iurrebasok, Albert Fabrak, Iñaki Martinez de Lunak, Sagrario Alemanek, Iñaki Lasak, Iker Martinez de Lagosek eta Paxkal Indok egingo dute gogoeta datuen gainean.