Euskaraz bizitzeko eskubidearen aldeko Nafarroako kanpainak "harrera paregabea" izan du

"Oso positiboa da" martxoaren 22an abiarazi zuten Nafarroako kanpainaren balorazioa, herritarren "harrera paregabea" izan baita, Kontseiluaren arabera, eta etziko manifestazioan euskaraz bizitzeko eskubidea ozen aldarrikatzeko deia egin du kanpaina horri amaiera biribila emateko. Iñaki Lasa Kontseiluko ildo politikoaren arduradun eta manifestazioaren koordinatzaileak hitz egin du Kontseilua osatzen duten erakunde guztien izenean. Haren ustez, kanpaina osoan nagusitu den mezu positiboarekin joan behar da larunbateko manifestaziora. Golem zinema aretoetan da hitzordua, 18:00etan.

"Euskaraz bizi nahi dugula adierazteko erabiliko dugu manifestazioa", Lasak nabarmendu duenez, eta ideia horrekin bat egiteko, Euskaraz bizi nahi dut leloa daraman kartelak egiteko eskatu die herritarrei. "Herritar bakoitzak eraman dezaka kartel bat". Nafarroako Gobernuaren hizkuntz politika salatzeko agertokia ere izango da Iruñea.

Manifestazioa baino lehen, Donibane auzotik kalejiran irtengo dira Golem zinema aretoetara, eta horrez gainera, Nafarroako hainbat lekutan autobusak antolatu dituzte, besteak beste, Erriberan, Sakanan, Lizarran, Baztanen, San Adrianen eta Tafallan.

Kanpaina arrakastatsua

Martxoaren 22tik esperotako harrera baino hobea izan du Nafarroako euskararen aldeko kanpainak. Eskualdeetan kontseilutik abiarazitako ekimenez gain, herrietan euren kabuz antolatutako hamaika aldarrikapen ere izan dira, mahai-inguruetan, hitzaldietan, bizikleta martxetan, manifestazioetan eta jaietan. Ikastetxeetako ikasle nahiz irakasleek ere parte hartu dute horietan, baina baita eurek propio ikastetxeetan antolatutakoetan ere.

30.000 eskuorri banatu dituzte, 6.000 kartel eta milaka pegatina. Kanpainarako abiarazi duten blogean 24.000 bixita baino gehiago izan dituzte, eta manifestazioak 4.000 atxikimendu jaso ditu dagoeneko.