Euskara ofiziala den lurralde guztietan, hizkuntza horretan idatzitako aktek legezko balioa dutela berretsi du gaur Legebiltzarrak, EAJ eta EH Bilduren babesarekin.
Ebazpenak babesa eskaintzen die euren aktak euskaraz idazten eta bidaltzen dituzten udalei, eta bat egiten du Jaurlaritzak salaketen aurrean agertutako jarrerarekin. Jaurlaritzak eholkularitza eskaintzen die Carlos Urkijo Espainiako Gobernuko ordezkariak jarritako salaketei aurre egitea erabakitzen duten udalei.
Ez dira, ordea, erabakiarekin bat etorri PSE-EE, PP eta UPD. Vicente Reyes sozialistak "fundamentalistatzat" jo du EAJ eta EH Bilduren jarrera, eta nabarmendu du euskara ofiziala izan arren, akta ofizialak bi hizkuntzatan egotea eskatzen duela legeak.
Bide beretik jo dute PPko Iñaki Oiartzabalek eta UPDko Gorka Maneirok ere. Lehenak "hizkuntzaren talibanak" gaitzetsi ditu eta bigarrenak, berriz, ohartarazi du "bortxaz ezarritako jarrera obsesiboek" ez diotela euskarari "mesederik egiten".
