1.400 ume inguruk hogei kilometroko bidaia egin behar dute, batez beste, egunero, Nafarroan, euskaraz ikasi ahal izateko. Nafarroako Gobernuak ez-euskalduntzat jotzen duen eremuan bizi dira. Euskaraz ikasi ahal izateko, ahalegin berezia egin behar dute haien gurasoek. Egoera hori salatuko du Sortzen Ikasbatuaz-ek datorren igandean, eremu ez-euskalduneko herri Villatuertan, euskaraz ikasteko eskubidea aldarrikatzeko bestaren bidez. Harekin bat egin dute Iruñean Nafarroako euskalgintzako eta sindikatuen esparruko hainbat eragilek, tartean AEK-k, IKAk, Topaguneak, Kontseiluak, Behatokiak, NIZEk, ELAk, LABek, EHNEk eta Hiruk. Bestan parte hartzera deitu dituzte herritarrak.
Igandean 10:30ean hasiko da besta. Eta eguerdian omenaldia eginen diete eremu ez-euskalduneko herritarrei, "legeak ezartzen dizkien mugen gainetik, euskaraz ikasteko eta bizitzeko egindako hautuagatik". Egungo oztopoak gainditzeko, hain zuzen, euskarak Nafarroa osoan ofizial izan behar duela nabarmendu du AEK-ko arduradun Helios del Santok, Sortzen Ikasbatuaz-ekin bat egin duten eragileen izenean. "Egungo egoerak hizkuntza eskubideak urratzen ditu; hala ere, zailtasunen gainetik, euskaraz ikasi eta bizi nahi dutenen kopuruak gora egiten du", erran du.
