Bi haur eskolatan euskarazko eredua jartzeko erabakia eten egin du auzitegiak, guraso baten salaketa bere eginik. Epaileak nabarmendu du erdaldunei "kalte larria" ekarriko liekeela euskarazko eskolak. Horren aurka protesta egiteko, elkarretaratzea egin dute 12:00etan Udaletxe plazan.
Euskalgintzako kideak, alderdietako eta sindikatuetako ordezkariak, gurasoak, haurrak... Askotariko jendea izan da protestan. Jai giroan elkartu dira, eta txaloka eta "haur eskolak euskaraz" oihu artean amaitu da protesta.
Jai giroan ari dira protesta egiten euskarazko eskolen eskaintza bertan behera utzi duen epaiaren aurka @berriapic.twitter.com/6zRPTxHSGS
— Ion Orzaiz (@IonOrzaiz) 2016(e)ko maiatzak 7
Iruñeko Administrazio Auzietarako 2. epaitegiak hartu zuen ostiralean erabakia: euskarazko haur eskolen eskaintzan atzera egiteko agindu dio Iruñeko Udalari, ikasturte berrirako iragarriak zeuden aldaketak bertan behera utzita. Epailearen ustez, "kalte larria" eraginen lieke ikasle erdaldunei eta haien familiei bi haur eskolatan euskarazko eredua jartzeak. Hortaz, egoera lehengoratzea erabaki du, salaketa aurkeztu zuen guraso baten tesia bere eginik.
