Ikastolen Elkarteak Bilbo Zaharrean duen Harrobia Lanbide Heziketa zentroak izan du antolatzeko ardura. Hamasei langile ditu. “Ikastola txikia gara, baina euskaraz egiten den Lanbide Heziketa ere oso apala da. Beraz, egoeraren isla gara”, azaldu du Ferndando Garridos ikastetxeko zuzendariak. Hala, euren zentroa ezagutzera emateko aprobetxatuko dute jaia. “Ibilaldiaren eguna matrikulazio sasoi betean dator. Horregatik, Lanbide Heziketa euskaraz egitera animatu nahi ditugu gazteak, gure ikastolan edo beste zentroetan”. Izan ere, euskarazko eskaintza %10ekoa da.
Ikastolan bertan abiatuko da ibilbidea. Eraikina eta eskaintza ezagutzera emateko aprobetxatuko dute. Horrez gain kontzertuak ere izango dira. Lehen gune horrek bigarren eremu bat izango du Mariaren Bihotzaren plazan, auzokoak ere Ibilaldiaren parte izateko. Miribillako Gernika lorategietan egongo da bigarren gunea, rock kutsuko musika eskaintza izango duena. Handik itsasadarrera jaitsiko da: Areatzan, Guggenheim inguruan eta Erripa kaian egongo dira falta diren guneak. Museo ondokoa izango da umeena.
Berrikuntzarik ere badakar aurtengo Ibilaldiak. Ikastolen inguruan sortu diren gazteen musika taldeen emanaldiak izango dira Bilborocken. Eta, azken urteetan bezala, Bizkaiko ikastoletako ikasleen arteko erronka ere errepikatuko dute. Lehorrean eta itsasadarreko uretan osatu beharko dituzte probak.
Bilboko Udalak garraio publikoa erabiltzeko aholkua egin du. Pazientzia ere eskatu du Sabin Anuzita Euskara, Kirol eta Gazteria zinegotziak, Ibilaldiarekin batera asteburu horretan beste hainbat ekitaldi jendetsu ere izango direlako Bizkaiko hiriburuan.
