Eusko Jaurlaritzako Hezkuntza Sailak nabarmendu du «ikerketaren aldeko apustua» egiten jarraitu nahi dutela. Hori horrela, 2022tik 2025era 42 milioi euro bideratuko dituzte «bikaintasuneko» ikerketara. Donostian gaur goizean egindako prentsaurrekoan eman dituzte deialdiaren nondik norakoak Adolfo Morais Eusko Jaurlaritzako Hezkuntza Saileko Unibertsitate eta Ikerketako sailburuordeak eta Amaia Eskisabel Ikerketako zuzendariak. Asteazkenetik zabalik dago deialdia EHU Euskal Herriko Unibertsitateko, Mondragon Unibertsitateko eta Deustuko Unibertsitateko ikerketa taldeentzat, eta hilabeteko epea izango dute izena emateko.
Deialdia indartu dute bai finantzaketari dagokionez, bai ikerketa taldeen kopuruari dagokionez ere. Hain zuzen, aurreko lau urteetako deialdiarekin alderatuta, diru kopurua %20 areagotu du Hezkuntza Sailak. Horrekin 200 talde finantzatu nahi dituzte gutxienez —aurreko lau urteetan 170 izan dira—. Orotara, 3.000 profesionalen lana ordaindu nahi dute.
Moraisen hitzetan, diru laguntza lortu nahi duten ikerketa taldeek «ebaluazio zorrotza» gainditu beharko dute. Unibasq Euskal Unibertsitate Sistemaren Kalitate Agentzia arduratuko da lan horretaz. Besteak beste, kontuan hartuko dute proposatutako helburuek «izaera berritzailea» edukitzea, I+G+B arloko lanen kalitatea eta taldearen produktibitate zientifikoa. Gainera, emakumeen lidergoa lehenetsi dute, eta puntu bat gehiago eskuratuko dute emakumeek gidatutako taldeek.
Jakintza arloei dagokienez, bost esparrutako lanak finantzatuko dituzte: aurrekontuaren %40 zientzia esperimentaletarako erabiliko dute; %21, ingeniaritzarako eta arkitekturarako; %16, osasun zientzietarako; %15,2, gizarte zientzietarako eta zientzia juridikoetarako; eta %7,8, arterako eta giza zientzietarako.
