UPDko legebiltzarkide Gorka Maneirok aurkeztu du mozioa, baina gainerako talde guztiek baztertu egin dute proposamena. Horren arabera, Espainiako erkidego guztiek eskumen berdinak izan beharko lituzkete eta "pribilegio fiskal" guztiak ezabatu beharko lirateke, "estatuaren bideragarritasuna eta herritarren berdintasuna eta ongizatea bermatzeko".
PSE-EE eta PPren zuzenketak ere baztertu ditu Eusko Legebiltzarrak. Sozialistek proposatutakoan, Eusko Legebiltzarrak Espainiako Kongresuari eskatu behar zion konstituzioaren erreforma bat abia zezala lurralde antolaketa "modu federalean" eguneratzeko. Bertan aitortuko litzateke "haren pluraltasuna, eta eskumenen eta finantzaketaren arazoak konponduko lirateke".
PPren proposamenak Espainiako Konstituzioan oinarritutako autonomien eredua babesten zuen, arau horren "balizko erreforma edo modernizazio" bati ekiteko "aurretik adostasun zabalak" behar izatearekin batera.
Gehiengo demokratikoak eta herritarren borondatea
Joseba Egibar EAJko legebiltzarkideak gogorarazi du egungo ereduan Espainia dela aitortutako subjektu politiko bakarra. Hori dela eta, uste du Euskal Herria subjektu politikotzat aitortzen bada hark erabakitzeko eskubidea izango duela "bere bidea" egiteko; hori lortzeko, berriz, akordiorik ezean, "onak dira gehiengo demokratikoak".
Hasier Arraiz EH Bilduko legebiltzarkideak, berriz, gogorarazi du Euskal Herria estatu independente izatea dela koalizio subiranistaren proiektua. Haren iritziz, "herritarren borondatea" izan behar da "muga" bakarra Euskal Herriaren jokaleku juridikoa definitzerakoan.
