Eusko Legebiltzarreko taldeek atentatua gaitzesteko testua onartu dute, PPk izan ezik, eta EHAK ez da joan batzarrera

ETAri indarkeria "behin betiko" uzteko eskatzeaz gain, EAJ, EA, EB-Berdeak, PSE-EE eta Aralarrek "elkarrizketa demokratikoa" eskatu dute, "terrorismoari aurre egin eta eskubide eta askatasunak defendatzeko". EHAK-k esan du "PPren joko eta liskar berean ez sartzeko" egin diola uko joateari.

Eusko Legebiltzarrak ETAk abenduaren 30ean Madrilen Barajasko aireportuan egindako atentatua gaitzetsi du -bi lagun hil ziren furgoneta-bonbaren ondorioz-. Hain zuzen,EAJ, EA, EB-Berdeak, PSE-EE eta Aralarrek onartu dute agiria. PPk haien testuaren kontra bozkatu du, eta EHAK ez da batzarrera joan.

PPk ez-legezko proposamena aurkeztu du, ETAri "indarkeria behin betiko uzteko" eskatuz. Diputazio Iraunkorreko bileran EAJ, EA, EB-Berdeak, PSE-EE eta Aralarrek ondoren testu bateratua egin dute, PPren eskaerari pasarte bat erantsiz, "elkarrizketa demokratikoa" eskatuz, "terrorismoari aurre egin eta eskubide eta askatasunak defendatzeko". Horixe onartu da.

EHAK-k esan du "PPren joko eta liskar berean ez sartzeko" egin diola uko joateari. Gaurko bileraren helburua ere salatu du EHAK-k, "ez delako planteatu atentatuaz hitz egin eta bere ondorioak aztertzeko, baizik eta azkenean, 'froga' moduko batean bilakatu da, guk atentatua gaitzetsi dezagun". PP behin eta berriz esaten ari da EHAK-k abenduaren 30etik gaitzespenik egin ez duela-eta, alderdi hori legez kanpo uzteko prozesua ireki behar dela.