Datu hori boto nuluaren kontaketa ofizialarena da. Ezker abertzalea saiatu da mahaiz mahai D3Mren botopaperak kontatzen, baina horretarako arazoak izan dituzte hainbat lekutan. Datozen egunetan emango dute datua.
D3Mk hainbeste boto jaso izana «Europan inoiz izan den desobedientzia zibileko ekimenik handiena» izan dela aldarrikatu du Itziar Lopategik, jarraitzaileekin goraino betetako Esperanza frontoian. Hainbat bandera eta ikurrinekin eszenatoki gainera igo dira ezker abertzaleko jarraitzaile historikoak, tartean Arnaldo Otegi, Tasio Erkizia, Itziar Aizpurua eta Rafa Diez. Lopategik haien babesean esan du, atzoko hauteskundeak historiara pasatuko direla desobedientzia zibileko ariketa handia izateaz gain, «Espainiaren inposizioaren» bozak izan direlako.
«Inoizko hauteskunde antidemokratiko eta frankistenetan» herritarrek emandako babesarekin gustura agertu da ezker abertzalea, eta «urrezko botoaren» aldeko hautua egin duten herritarrei eskerrak eman dizkie Julen Aginako kideak.
Antonio Machado poetaren hitzak ekarri ditu gogora Aginakok. 1939ko frankistak asko zirela eta oinez ibiltzen zirela esan zuen Machadok. «Gaur egungo frankisten zoritxarrerako, jende on asko dago, eta oinez ibiltzen da», esan du Aginakok. Jende horrek eman du «urrezko botoa», ezker abertzaleko kidearen irudiko, «legez kanporatze eta oztopo guztien gainetik».
Milaka lagun horien «itxaropen eta ilusioarekin» egingo du lan ezker abertzaleak aurrerantzean. Diotenez, «demokraziaren» bidean egingo dute lan hori, «demokrazia zerotik demokrazia hiru milioira, independentziara». Hiru egiteko nagusi izango dituzte, Lopategiren arabera: Eusko Legebiltzarrean osatuko duten «trukatutako argazkiari» buelta ematea; «lardaskeria estatutario berri bati» ateak ixtea; eta Euskal Herria «independentziaren bidean jartzeko», marko demokratikora eramatea.
Bestalde, atzoko egunean zein kanpaina guztian ezker abertzaleko kideek jasan duten «poliziaren jazarpena» salatu du Aginakok. D3Mren botopaperaren «jazarpena» gertatu dela salatu du.
