Ohar baten bidez, ezker abertzaleak atxikimendua adierazi dio larunbatean Donostian Eleak mugimenduak antolatuta Euskal Herria Libre eta Legala. Eskubide guztiak guztiontzat lelopean egitekoa den manifestazioari.
Oharrean ezinbestekotzat jo ditu modu honetako mobilizazioak, "herritarrei aitortzen dielako eskubide osoko agertoki baten aldarrikapenaren protagonismoa"; ezker abertzalearen iritziz, Euskal Herrian abian den prozesuaren "berme eta motorra" euskal gizartea eta mobilizazioa dira.
Ezker abertzaleak "Euskal Herriak behar eta merezi duen etorkizunarekin" duen konpromisoa berretsi du. "Inolako indarkeriarik gabeko Euskal Herria nahi dugu, inoren aurkako mehatxurik gabea, presio, jazarpen, atxiloketa eta torturarik gabea", zehaztu du. Horretarako, Espainiak "epaiketa politikoa, jazarpenak eta oinarrizko eskubideen urraketak" bertan behera uztea ezinbestekoa dela gehitu du, eta "Madrilek bultzatzen duen blokeo politikaren amaiera exijitzeko" mobilizatzen jarraitzeko deia egin du.
