Ezker abertzalearen aurkako azken erabaki judizialak kritikatu ditu EAJk

Olabarriak hitz gogorrak izan ditu abuztuaren 10ean No apartheid. Autodeterminazioa manifestazioa antolatzea egotzita Juan Joxe Petrikorena, Iñigo Balda eta Ainhoa Iñigo atxilotu izana. "Oso larria da, ez dute inolako deliturik egin. Atxilotutako lagunak baimendutako manifestazio baten antolatzaileak eta komunikatzaileak izan ziren. Baimenduta zegoen manifestazio bat antolatzeagatik atxilotu dituzte, ez bertan gertatuko zerbaitengatik. Hori larria da oso. Manifestatzeko eskubidea oinarrizko eskubide bat da, eta oinarrizko eskubidea den einea babestu beharra dago".

Sozialista Abertzaleak taldeko parlamentari Jon Salaberriaren aurkako zigorra ere salatu du Olabarriak. "Eusko Legebiltzarreko edozein parlamentarik du bortxaezintasun eskubidea, eta zigorrak eskubide hori urratzen du. Parlamentari batek parlamentuan esaten duen zerbaitengatik kondenatzea izugarria da; ez da inon horrelakorik ikusi. Demokraziaren aurkako atentatu bat da".

Arzalluzek Espainiako Auzitegi Goreneko presidente Francisco Hernandoren dimisioa eskatu du

Euzkadi Buru Batzarreko presidente Xabier Arzalluzek Espainiako Auzitegi Goreneko presidente Francisco Hernandoren dimisioa eskatu du. Arzalluzen ustez, "Hernando bere lanean aldrebes bat izateaz gain Auzitegi Gorena desohoretzen du". Espainiako epaileen kurtso hasieran Konstituzioaren edozein motako aldaketa ukatzeaz gain, epaileek Ibarretxeren Planaren aurrean ez direla "geldi geldituko" adierazi zuen Hernandok.

Arzalluzek azpimarratu duenez, "Francoren garaitik ez da horrelakorik ikusi. Hernandok ikuspegi politiko zehatz baten aldeko jarrera nabarmena du". Dena den, ezkor agertu da Arzalluz, eta Hernandok ez duela dimitituko uste du. ·"Egin dezakeen gauzik onena dimisioa aurkeztea da; hala ere, ziur naiz ez duela dimitituko. Azken finean Espainiako Gobernuarentzat mauka bat da bera bezalako pertsona bat. Espainian justiziaren politizazioa nabarmena da".