Ezker Abertzalearen legalizazioaren aldeko giza kateak egin dituzte

Bilbon eta Donostian Ezker Abertzalearen legalizazioaren aldeko giza kateak egin dituzte. Donostiako alde zaharrean eguerdian izan da ekimena eta hainbat jendek hartu du parte bertan. Sarriegi plazan bildu dira parte hartzaile guztiak hasieran. Handik abiatu dira, eta alde zaharrean bueltaka ibili dira, legalizazioaren aldeko kartelekin. Bretxako merkatuan ere ibili dira. Portuan amaitu da ekimena eta pankarta bat jarri dute bertan. Bilbon, berriz, udaletxe aurretik abiatu dira, eta Guggenheim inguruan amaitu dute. Gasteizen ere giza katea egitekoak dira 19:30etan Ama Birjin Zuriaren plazatik abiatuta.

Bilbon Niko Moreno Elorrioko alkateak ere parte hartu du, eta "iruzur politiko" gehiagorik ezin dela izan adierazi du. "Datorren urtarrilean gure alderdi berria, gure formazio berria, gure proiektu berria aurkeztuko dugu, prozesuari ekarpena egiteko modu onena delako eta herritarren exigentzia bat delako".