Gay eta lesbianen ezkontzak arautzeko urrats bat egin du gaur Frantziako Asanblea Nazionalak. Ezkontza homosexualak onartzeko lege proiektuaren artikulu nagusia onartu dute, 249ren aldeko botoa jasota. 79k egin dute artikuluaren aurka. Artikulu horretan zehazten denez, genero ezberdineko nahiz berdineko pertsonen artekoa izan daiteke ezkontza.
Asteartean hasi ziren eztabaidatzen lege proposamena, eta egun ugariz jarraituko dute. Frantziako Justizia ministro Christiane Taubira pozik azaldu da bozketaren emaitzarekin, eta esan du "norberak etorkizun komun bat norekin osatu erabakitzeko askatasuna" ezarriko dutela: "Ez dago arrazoirik Estatuak ez bermatzeko bikote homosexualen ezkontza ere".
Baionan, protesta egin dute Frantziako Asanblea Nazionalak hartutako erabakiaren aurka. Herriko Etxearen aitzinean elkarretaratzea egin dute, eta han izan dira, baita ere, hainbat talde antifaxista. Polizia joan da bi taldeak banatzera.
