Iñaki Oiarzabal Euskal Autonomia Erkidegoko PPko idazkari nagusiak eman du kongresuaren berri. Bilbon eginiko agerraldi batean, azaldu du alderdiaren proiektua "indartzeko zelai erdira botatzeko" egingo dutela ezohiko batzarra, "egungo une politikoan erabakigarria izan dadin".
Datorren astelehenean elkartuko da alderdiaren zuzendaritza Bilbon, eta bertan deituko dute batzarrera. "Ahalik eta zabalena eta parte hartzaileena" izatea nahi dute, eta, ezustekorik ezean, Arantza Quiroga alderdiko presidente karguan berretsiko dute.
Zuzendaritza berrituko dutela esan du Oiarzabalek, eta ukatu egin du militanteak Vox alderdi sortu berrira joatea saihesteko egingo dutenik kongresua. Halaber, Quirogaren "kuraia eta ausardia" goraipatu ditu, alderdiaren babesa izan arren "harekiko konfiantza berretsi nahi izan duelako".
