Filipe Bidart: "Bake prozesua bultzatu egin behar da"

Ikusmin handia piztu du gaur ere Filipe Bidart Iparretarrak-eko (IK) preso ohiak. Haren senide eta lagunak ongietorria egiten ari zatzaizkio Frantzia hegoaldean, Magalas herrian, eta eguerdian prentsaurrekoa eman du Bidartek. Makina bat kazetari eta argazkilari bildu da bertan.

Bidart, baina, labur mintzatu da. Minutu batez baino ez du hitz egin. "Espetxetik irtetean esan bezala, bake prozesua bultzatu egin behar da, hori delako bake justu eta iraunkorra lortzeko bide bakarra. Frantziako Estatuak Euskal Herriaren existentzia aitortu behar du", adierazi du.

Ondoren, haren bi abokatuek hartu dute hitza, eta IK-ko preso ohiaren askatzearen ondotik Frantzian zenbait politikariren aldetik izan diren jarrera eta adierazpenak salatu dituzte. Esaterako, Bidartek espetxetik irtetean esandakoa "krimenaren apologia" izan daitekeela erran zuen Pascal Clement Frantziako Justizia ministroak eta berriro zigortua izateko aukera dagoela. Dena dela, gero Justizia ministeriotik argitu zuten Clementek Bidarti "abisu" bat eman nahi izan ziola eta "krimenaren apologiarik" ez dagoela. Raymond Couderc Beziersko auzapezak, berriz, erran zuen Bidart ez dela ongi etorria Beziersera (hor bizi beharko du 2014a arte eta hasiera batean han zen egitekoa gaurko ongietorria). Bidarten aurkako kanpaina salatu dute haren abokatuek.

300 bat lagun bildu dira Magalasen -Beziersetik kilometro gutxira-, eta orain bazkaria egiten ari dira.

Bidart asteazkenean askatu zuten, Clairvaux espetxean. 19 urtean eduki dute preso. 1988an atxilotu zuten, Bokalen (Lapurdi), IK-ko beste lau kiderekin batera. Orain baldintzapeko askatasuna eman diote eta Frantzia hegoaldean Beziers herrian bizi beharko du, eta han eskaini zioten lanpostua bete. Baldintza horiek 2014. urtera arte izanen dira indarrean.