Luis Barroso Espainiako Auzitegi Nazionaleko fiskalak Nafarroako Segiko eta Ekineko ustezko bederatzi kiderentzat 8 eta 10 urte arteko kartzela zigor eskaerari eutsi dio gaur, epaiketaren beste saio batean. Luis Goñi Lara, Javier Sagardoi Lana, Aritz Azkona Dominguez, Mikel Jimenez Martin, Alberto Lopez Iborra, Maider Caminos Miranda, Maitane Intxaurraga Uribarri, Amaia Legarra Beunza eta Noe López Albizu ari dira epaitzen.
Lopezek, Intxaurragak eta Caminosek Guardia Zibilaren esku zeudela egindako deklarazioak hartu du oinarritzat fiskalak zigor eskaera egiteko. Auzipetuek atxiloaldian tratu txarrak jaso izana salatu izan dute.
2007 eta 2008 artean Barañainen kale erasoak egin izana ere egozten die Barrosok.
Azaroaren 21ean jarraituko du epaiketak.
