Iñigo Cabacasen heriotzagatik hasitako epaiketa bukatzear da, eta alde bakoitzak bere ondorioak eta behin betiko eskaerak aurkeztu dituzte gaurko saioan. Jakin-min handia zegoen fiskalak zer egingo: izan ere, fiskaltzak prozesu osoan izandako jarrera kritika iturri izan da, eta akusazio partikularrak behin baino gehiagotan salatu du fiskaltzak ez duela "ezer" egin prozesuak aurrera egin zezan, eta "oztopoak" baino ez dituela jarri.
Epaiketa hasterakoan, fiskaltzak iragarri zuen behin-behinean absoluzioa eskatuko zuela, delitu aztarnarik ikusten ez zuelako, baina epaiketan akusatu eta lekukoen adierazpenak entzunda eta frogak ikusi ondoren, ez zegoen argi jarrera horri eutsiko ote zion edo, aldiz, zigor eskaeraren bat egingo ote zuen. Azkenean, oraingo jarrerari eustea erabaki du.
Saioa bukatutakoan, Ilñigo Cabacasen guraso Fina Lizeranzu eta Manu Cabacas oso minduta agertu dira fiskalaren jarrera dela eta: "Gure semea hilerrian dago, eta fiskalak ez horretan delitu aztarnarik ikusten?", galdetu du Cabacasen amak, malko artean. "Umiliatu egin gaituzte". Manu Cabacasek ere ez zion fiskalaren jarrerai azalpenik aurkitzen, "epaiketan gertatu dena ikusi ondoren".
Aurrez, perituak izan dira deklaratzen. Sei ertzain daude auzipetuta. Zuzeneko kontaketa egin du Gotzon Hermosilla kazetariak:
Lagun eta senitartekoek hainbat mobilizazio antolatu dituzte epaiketaren amaierarekin batera. Gaur elkarretaratzea egin dute Bilboko epaitegiaren aurrean. Bilbon ez ezik, Donostian —19:30ean Bulebarrean— eta Gasteizen ere —19:30ean Andre Maria Zuriaren plazan— egingo dituzte gaur elkarretaratzeak. Bestalde, bihar manifestazioa egingo dute Bilbon, 19:30ean, kalezulotik hasita.
