Errauste planta bertan behera utzi zuen Gipuzkoako Hondakinen Kudeaketak (GHK) iaz, eta erabaki hori legez kanpokoa izan zitekeelakoan azterketa agindu zuen EAEko fiskal nagusi Juan Kalparsorok. Gaur iragarri du fiskalak diligentziak artxibatzea erabaki duela ez daukalako kereila edo salaketa bat jartzeko adinako frogarik. Izan ere, Kalparsorok uste du itxaron egin behar dela martxan dauden prozedura zibil eta administratiboek argitu arte hartutako erabakiak zenbateko zama ekonomiko eragingo dion administrazioarik. "Uste dut beste era bateko prozedura bat martxan jarri aurreko kontu aurrejudizialak direla horiek".
Kalparsorok aldeei orri bateko agiri bat helarazi die hartutako erabakia azalduz, eta adierazi du diligentziak berriz irekitzeko aukera legokeela, besteak beste, bankuekin kontratutako maileguen aurka zabaldutako prozeduratik edota proiektua bertan behera uzteko enpresekin egindako akordioaren aurka egindako inpugnaziotik, froga berriak jasoz gero.
