Azpeitiko Etxerat-ek elkarretaratzea egin zuen 2011n, herriko jaietan, sakabanaketa amaitu eta presoak Euskal Herrira eramateko eskatzeko. Herrira zioen pankarta erakutsi zuten protestan, Alacanteko Villena espetxeko Gotzon Aranbururen argazkia ondoan zuela. Aritz Arzallus argazkia erakutsi izanagatik epaitu zuten iazko ekainean, Espainiako Auzitegi Nazionalean.
Fiskaltzak urtebeteko zigorra eskatu zuen orduan, eta gaur eskaerari eutsi dio. Fiskalaren arabera, "ez dauka zentzu gehiegirik" horrelako kartelak jartzea herriko jaien testuinguruan, eta "terrorismoa goratzea" egozten dio. Epaituak akusazioa ukatu zuen, argazkia jarri izanaren zergatia azalduta: "Egoera jakin baten berri emanda, pertsonalizatuta, aldarria indartu nahi nuen".
Arzallusen defentsak adierazi du ekintzok ez dutela gorazarrerik egiten, soilik Herrira zioten aldarrikapenak eta pankartak egon baitziren. Gogorarazi du pankarta Espainiako Auzitegi Nazionalak baimendutako ekitaldi batean erakutsi zela.
