Gose greba abiatu duten euskal eta korsikar presoen izenean, Ibon Goieaskoetxeak eta Joseba Iturbidek gutuna idatzi zioten joan den maiatzaren 30ean Fleury Merogis presondegiko zuzendariari. Salatu zuten “inolako abisurik” gabe aldatu dizkietela bisitak.
Etxerat elkarteak jakinarazi duenez, espetxeko zuzendariak ez die erantzun, eta gose grebara jo dute Iurgi Mendinueta, Aitor Elizaran, Igor Suberbiola, Ibon Goieaskoetxea, Joseba Iturbide, Juan Jose Oses eta Andoni Goikoetxeak. Horrez gain, patio garaian ziegetara itzultzeari uko egin diote, protesta modura. Gose greban dauden Korsikako presoak Cedric Courbey, Xavier Ceccaldi, Laurent Susini eta Eric Marras dira.
Hilean lau bisita luze (astean bi bisita pilatzeko aukerarekin) izateko eskubidea erdietsi zuten presoek. Ondoren, kartzelako obra batzuk zirela-eta, eta “leku falta” zegoela argudiatuta, hiru bisitara murriztu zituzten Fleuryn bisitak, asteburuetakoak mugatuta. Lanak bukatutakoan aurreko egoerara bueltatuko zirela hitz eman zieten presoei aldez aurretik. Baldintza horrekin onartu zuten presoek aldaketa akordioa, baina behin obrak amaituta, zuzendaritzak ez du aurreko bisita kopurua berrezarri.
“Badakigu jazarpen politikoan oinarritzen den eta gure kondenari ezartzen diozuen familien urruntze politikaren ondorio gehitu bati erantzuten diola honek”, idazten diote zuzendaritzari.
Etxerat-ek kartzelako zuzendaritzari eskatu dio urratsak egin ditzala presondegi horretako egoera aldatzeko.
