Bake prozesua indartzeko asmoz, martxoan Bilbon eta Iruñean egindako Foro Sozialaren ondorioak eta horietatik eratorritako gomendioak aurkeztu dituzte gaur Donostiako Aieteko jauregian eginiko prentsaurrekoan. Nabarmendu dute konponbide prozesuak egun bizi duen “blokeo eta zailtasun momentua” gainditzeko adostasun “zabalak eta oinarrizkoak” behar direla erakunde eta eragileen artean. Gomendioen alorrean, berriz, gai hauek azpimarratu dituzte: desarmea eta ETAren egitura militarren desegitea, preso eta iheslarien itzultzea, giza eskubideen bermea, jazotako gutziari aurre egitea eta etorkizuneko elkarbizitzaren oinarriak ezartzea. Bide horretan, garrantzitsutzat jo dute legeak errealitatera egokitzea eta justizia trantsizional bat ezartzea.
Lokarriko eta Bake Bideako kideek parte hartu dute ekitaldian eta, haiekin batera, Conciliation Resources erakundeko zuzendari Andy Carlek. Lokarriko Paul Riosek azaldu duenez, martxoan eginiko foroan jasotako ekarpenetan oinarrituta daude hamabi gomendioak eta bertan parte hartu zuten eragile eta erakundeekin partekatu dituzte. Orain, alderdi eta eragile guztien esku utziko dituzte, ahal duten neurrian beren ekarpenak egin eta aurrera eraman ditzaten. Hona hemen hamabi gomendioak, labur:
1.Etorkizuneko elkarbizitzarako oinarri sendoak ezarriko dituen elkarrizketa eta berradiskidetze ariketa bultzatzea, erakundeen, alderdi politikoen eta gizarte zibilaren parte hartze zabala eta aktiboaren bidez.
2.ETAren armen eta egitura militarren desegitearekin bukatuko den prozesu kontrolatu, ordenatu eta adostu bat diseinatzea.
3.Erakunde erraztaile independenteen esku hartzea eta laguntza bultzatzea.
4.Legeak errealitatera egokitzea eta justizia trantsizional bat ezartzea. Giza eskubideen kontra edo presoen trataera humanitarioaren kontra doazen espetxe politikaren aspektuak aldatzea, nazioarteko estandarrak aintzat hartuz eta salbuespen neurriak bertan behera utziz: hala nola, gaixo larrien egoera konpontzea, zigorra bete duten presoak aske uztea, ezezko jarrerak gainditzea eta sakabanaketa amaitzea.
5.Presoen itzultze prozesua lege baliabideak erabiliz gauzatzea, modu integralean, mailakatuan, banakoa eta zentzuzko denbora tarte batean. Horretarako, presoei eskatu diete konpromisoa agertzeko eszenatoki berrriarekin eta indarkeriazko bideei uko egiteko, Eta, bereziki, beren jardueren ondorioz egindako mina aitortzea.
6.Presoak eragile aktiboak izatea eta instituzioen arteko harremanak eta iritzien partekatzea erraztea.
7.Iheslarien egoera aztertzea, gizartera daitezen bideak baliatuz.
8.Giza eskubideak eta askatasun demokratikoak guztiz ziurtatzeko mekanismoak sortzea. Aurrena, giza eskubideen egoera aztertuko lukeen erakunde independente bat sortzea.
9.Zigorgabetasunerako tokirik ezin dela izan jasotzen duen printzipioa finkatzea. Nabarmendu dute nazioarteko estandarrek aukera eskaintzen dutela justizia bake prozesuaren testuingurura egokitzeko.
10.Segurtasun indar eta kideen kopurua eta eginkizuna berdimentsionatzea eta kontrol mekanismoak indartzea.
11.Erakundeek bultzatzea egia, justizia eta adiskidetze prozesu zabala eta barneratzaile bat.
12.Biktima eta giza eskubideen urraketa guztien datu base ofizial, publiko eta osatu bat egitea.
