Joan den urrian aurkeztu zituen Foro Sozialak presoen auzia jorratzeko proposamenak, eta horien berri eman diote gaur goizean Eusko Legebiltzarrari Lokarriko eta Bake Bidean-eko ordezkariek. Gomendioak azaldu ez ezik, hiru eskaera zehatz ere egin dizkiote ganberari. Batetik, presoei dagozkien giza eskubideen errespetu eta berme maila ebaluatzeko txostena egin dezala eskatu diote Giza Eskubideen Batzordeari.
Bestetik, espetxe eskumena Euskal Autonomia Erkidegoaren esku uzteko eskaera egin dezala galdegin diote legebiltzarrari. Eta, azkenik, proposatu egin dute Eusko Legebiltzarreko Giza Eskubideen Batzordeak euskal presoen kolektiboko ordezkariekin bilera eska dezala "gizarteratzeko eta bizikidetza eraikitzeko" haien balorazioa eta proposamenak ezagut ditzan.
Foro Sozialak egindako gomendioak bere egin eta legebiltzarrari egindako eskaerak aztertzeko konpromisoa hartu dute EH Bilduk eta EAJk. PSE, berriz, kexu agertu da presoak izendatzeko erabilitako “terminologiagatik”, eta Foro Sozialeko kideei eskatu die zehaztu dezatela presoak “terrorismoagatik” daudela espetxean. Rodolfo Aresen ustez, presoei dagokie urratsak egitea, aurrera egin nahi bada. PPko legebiltzarkideek ez dute parte hartu giza eskubideen batzordean.
