Gerard Collomb Frantziako Barne ministroak jakinarazi du erabakia. Parisen helburua da egun epaitegietako mahaiak betetzen dituzten ehunka mila auzibide saihestea, eta, horretarako, kalamu kontsumoaren aurkako zigorrak leunduko dituzte. Hala, lehen auzitegietara eramateko arrazoi zena aurrerantzean isun ekonomikoekin konponduko da.
"Ez dugu despenalizatuko. Isuna jartzeak ez du esan nahi egoera eta testuinguruaren arabera zigor gogorragorik jarriko ez denik", ohartarazi du Collombek Europe 1 irratiari eskainitako elkarrizketan.
Egun Frantziako Estatuan indarrean den legediaren arabera, 3.750 euroko isuna eta urtebeteko espetxe zigorra jaso dezakete kalamua kontsumitzen dutenek. Azken urtean 3.000 pertsonatik gora zigortu dituzte.
