Frantziako Gobernuak uztailera arte luzatu nahi du Pariseko atentatuen ostean ezarritako larrialdi egoera. Manuel Valls lehen ministroak gaur France Info irratian jakinarazi duenez, beste bi hilabetez luzatu nahi dute (maiatzaren 26an amaitzekoa da berez), eta modu horretan Europako Futbol Txapelketa eta Frantziako Tourra egoera horretan jokatu. "Larrialdi egoera ezin da betiko izan, baina ekitaldi handietan segurtasuna erabat bermatu behar dugu", adierazi du Vallsek. Eurokopa ekainaren 10etik uztailaren 10era jokatuko da, eta Tourra, uztailaren 2tik 24ra.
Bernard Cazeneuve Barne ministroak gaur aurkeztuko du neurria ministro kontseiluan, eta hortik Estatu Kontseilura bideratuko dute, handik Parlamentura eramateko. Azaroan ezarri zuen Frantziako Gobernuak lehen aldiz larrialdi egoera, eta harrezkero luzatu egin du bi aldiz maiatzaren 26ra arte. Hainbat erakundek luzapen horiek kritikatu dituzte, tartean, Europako Kontseiluak. Erakunde horrek dio larrialdi egoerak dakartzan neurrien eragina "mugatua" dela terrorismoaren kontrako borrokan, eta bitartean oinarrizko eskubideak "gogor" murriztu dituela.
