Lau dira dagoeneko Espainiako Auzitegi Konstituzionalak atzera botatako helegiteak, Frantzian betetako kartzela urteak aintzat hartzearen inguruan. Azkena, Iñaki Bilbao Beaskoetxea euskal presoarena izan da, Ane Ituño abokatuak jakinarazi duenez. Hala, epaileek erabaki dute Frantzia preso emandako hamar urteak ez dituztela kontuan hartuko espetxean egin beharreko denbora kalkulatzeko.
Europako Batasuneko 2008/675 erabaki markoak zehazten du EBko estaturen batean betetako zigorrak balio juridiko bera duela gainerako estatuetan ere; hau da, modu bateratuan hartu behar direla. Espainiak, ordea, zuzentarau hori bere legediara egokitzean, salbuespen batzuk sartu zituen arauan, EPPK-ko presoei eragin ez ziezaion.
Auzitegi Konstituzionalak atzera bota ditu lau kasu, eta, beraz, Estrasburgoko auzitegiaren esku geratuko dira orain. Hark erabaki beharko du EBren zuzentarauaren interpretazioarekin Espainiak oinarrizko eskubideak urratu dituen ala ez.
Zazpi presok kalean behar lukete
Sarek apirilean jakinarazi zuenez, gutxienez zazpi presok kalean behar lukete, Frantzian betetako zigorrak aintzat hartuz gero. Honakoak dira: Josu Arkauz Arana (Arrasate), Jose Jabier Zabaleta Elosegi (Hernani), Iñaki Etxeberria Martin (Iruñea), Santi Arrospide Sarasola (Lasarte-Oria), Pako Mujika Garmendia (Ordizia), Jose Ramon Lopez de Abetxuko (Gasteiz) eta Bilbao bera (Lemoa). Aurreratu zuten preso horiek Estrasburgora joko zutela.
