605 euskal presotik 136 Frantziako kartzeletan daude; Ipar Euskal Herriko 33 familiak gutxienez senide bat dute preso. Datu horiek nabarmendu ditu Etxerat-ek gaur goizean, Frantziako espetxeetan euskal presoek eta haien senideek jasaten duten egoeraren berri emateko prestatu duen txostenaren aurkezpenean.
"Urte askoan salatzen ari garena erakusten du: Frantziako Estatuaren parte hartze zuzena euskal preso politikoen arazoan", ondorioztatu du Etxerat-ek. Gainera, senideek errepidean bidaia luzeak egiteak eragiten duen "nekea, presioa eta arazo ekonomikoak izugarriak" direla salatu du. Elkartearen esanetan, Frantziak oraindik ere ez du aitortu "bere kartzeletan preso politikoak" daudela eta "gatazkan parte hartze zuzena" duela, eta "errepresioaren bidean tematzea" egotzi dio.
Etxerat-ek dei egin die herritarrei Herrira-k antolatuta azaroaren 10ean Baionan egingo duten manifestazioan parte har dezaten: "Beharrezkoa da manifestazio horri behar duen garrantzia ematea. Gure senide eta lagunen eskubideei buruz ari gara".
