Frantziako Iraultzaren eguna ospatzen dute uztailaren 14an Ipar Euskal Herrian ere, eta egun horri aurre egiteko manifestaziora deitu du Aitzina gazte antolakundeak, egun berean. Salatu dutenez, hain zuzen, egun horrek "frantsesetik anitz du eta iraultzailetik guti". Manifestazioa ez dute soilik "zapalkuntza identitarioaren" kontra eginen, ordea: "Frantziaren eredu kapitalista, jakobino eta autoritarioarekin errotik moztu nahi dugu".
Frantziaren "orotariko zapalkuntzen" aitzinean Euskal Herriaren burujabetza aldarrikatuko dute, eta horregatik eman diote mobilizazioari Guk Euskal Herria leloa. "Irudikatu nahi dugu guk nahiko genukeen herria", azaldu du Maddi Sarasua Aitzinako kideak. Horretarako, manifestazio arruntetik haratago joanen direla azaldu dute: "Manifestakzioa eginen dugu, hainbat ekintza tartekatuz, eta manifestazioa animaturik".
Hamaika zapalkuntza
Anitz dira Ipar Euskal Herriko gazteek jasan beharreko zapalkuntzak, Aitzinako kideek azaldu dutenez. Bertzeak bertze, Frantzian egin nahi duten lan erreformak gehien kaltetuko dituenak direla salatu dute: "Gu gara miseria baten truke lan egitera behartuko gaituztenak betikoen etekinak handitzeko, turisten zerbitzurako sasoilari izanen garenak, edo gure ikasketak ordaintzeko gauak lanean pasako ditugunak". Eskaera zehatzak ere egin dituzte: erraterako, baxoa euskaraz egin ahal izatea, euskal preso eta iheslarien etxeratzea eta lurraren espekulazioarekin bukatzea. Horretarako, etorkizuna "gaurdanik eraikitzera" deitu dute: "Herrigintza ardatz, gure herriaren geroaz erabaki nahi dugu".
