Gaixo dauden euskal presoak aska ditzatela eskatzeko, Espainiako eta Frantziako estatuei mintzatu zaie Martin Garitano Gipuzkoako ahaldun nagusia, “salbuespen politika buka” dezaten. Gari Arruarte, Inma Berriozabal, Ibon Fernandez Iradi eta Aitzol Gogortza euskal preso gaixoen senideekin izandako bileraren ostean egin ditu adierazpenok Garitanok. Ahaldun nagusiak bereziki izan du gogoan Fernandez Iradiren egoera —bihar erabakiko du epaileak aske utziko duen—, eta hura askatzeko eskatu du.
Era berean, “giza eskubideen Europako legedia” betetzeko eskatu die Paris eta Madrilgo gobernuei, sakabanaketa politikari amaiera jarriz eta “Europako legediaren arabera zigorrak bete dituztenak berehala askatzea” onartuz.
