Bi begirada misteriotsu, inauterietako mozorro eta maskararen azpian. Bi argazki horiek dira inauterietako argazki lehiaketan saritutako hiru irudietako bi. Haur baten begiradarekin lortu du lehen saria Lizarrako Gaizka Untzuetak, bere herriko inauterietan ateratako argazkiarekin. Bi lagunentzako erlaxatze asteburua lortu du Lesakako Atxaspi hotelean.
Ane Gabiriak ere begirada bati esker jasoko du saria, hirugarrena kasu honetan. Maskara baten azpitik begiratzen duten begi berdeei esker. Donostiako Xarma jatetxean lagun batekin bazkaldu edo afaldu ahal izango du Gabiriak. Bigarren saria, berriz, ez dago begiradei lotuta. Suaren inguruan ateratako argazki bat da. Zizur Nagusiko inauterietan, Tartalo pertsonaia erretzen zuten bitartean atera zuen Karlos Lizoainek, eta, horri esker, La Perla Talasoterapian bi lagunentzako sasoian jartzeko zirkuitua lortu du.
