Martin Garitanok "errespetu falta" egotzi dio Alberto Ruiz Gallardon Espainiako Justizia ministroari, "legitimoki aukeratutako eta legea zorrotz betetzen duten erakundeak mehatxatzeagatik". Izan ere, Gipuzkoako Foru Aldundiak kontratazio publikotarako baldintzen artean euskara eskakizun batzuk egitea legez kontrakoa dela esan du Alberto Ruiz-Gallardonek gaur. Donostian izan da Gallardon, PPren hauteskunde kanpainako ekitaldi batean, eta ohartarazi du delitu "zantzu argiak" ikusi dituela erabaki horretan.
Estatuko abokatuak gaia aztertzen ari direla jakinarazi du Gallardonek. Erantsi du estatuaren abokatuek ikerketa bukatu artean, gobernuak ez duela beste ekintzarik edo adierazpenik aurreratuko.
Garitanok ohartarazi du gipuzoar guztien hizkuntz eskubideak errespetatu besterik ez duela egin aldundiak, eta Espainiako agintariei leporatu die arazo bat dutela hori onartzen ez badute. "Gallardonek “errespetu arazo bat” duela esan du, “legitimoki aukeratutako eta legea zorrotz betetzen duten erakundeak mehatxatu dituelako”.
“Lehendik onartuak zeuden irizpideak, legeak eta arauak aplikatu besterik ez dugu egin. Orain arte batzuk ez dira aplikatu eta guk aplikatu egin ditugu. Penagarria da Gallardon ministroak ez ezagutzea indarrean dauden legeak, dekretuak eta akordioak, baina hori ez da gure arazoa, Espainiako Gobernuarena baizik”, adierazi du Garitanok.
Gipuzkoako Foru Aldundiak astelehenean jakinarazi zuen euskara izango duela lehentasunezko hizkuntza agerraldietan. Gainera, azaldu zuen lehiaketa publiko bat galdu duela enpresa batek orain gutxi, obra zuzendarien artean bi euskaldun behintzat egotea zehazten zutelako kontratazio pleguek, eta enpresak ez baitzuen baldintza hori betetzen.
Antonio Basagoiti PPko lehendakarigaiak "nazi" deitu zion Bilduri atzo, erabaki horrengatik. Madrilgo gobernuari gertatuaren berri emango ziola ere erantsi zuen. Carlos Urkijo Espainiako Gobernuaren EAEko ordezkariak ere ohartarazi zuen ez duela utziko hizkuntzagatik inor "baztertzen".
