Martin Garitano Gipuzkoako ahaldun nagusiak adierazi du bere ustez EAJk "erantzukizun politikoa" duela Jose Maria Bravo Gipuzkoako Ogasuneko Irungo bulegoko zuzendari ohiaren auzian, EAJk herrialdeko Ogasuna 30 urtean zuzendu izan zuelako. "Bravoren kasu hori ez zen gertatu egun batean, baizik eta hamabost urtean. Ondorioz, hor erantzukizun politiko bat dago", esan du Garitanok Radio Euskadin.
Gipuzkoako Lurralde Auzitegiak atzo 11 urteko espetxe zigorra jarri zion Bravori, besteak beste funts publikoak bidegabeki erabiltzea eta dirua zuritzea leporatuta. Haren emazte Rosa Cobosi, berriz, hiru urte eta lau hilabetekoa.
Garitanok esan du Aldundiak kasuko diru gehien berreskuratuko duela, eta epaiketa eta epaia "eredugarriak" iruditu zaizkiola. "Guztion diruaz jabetzea ez da doan ateratzen". Bravok inpunitatea sentitu izan zuela azaldu du Garitanok.
