Europako zentral nuklearren segurtasuna hobetzeko neurriak emango ditu Europako Batasunak; zentral bakoitzak hartu beharko lituzkeen neurriak ere proposatuko ditu. Garoñako zentral nuklearrari (Espainia), esaterako, istripuetan gas leherketak prebenitzeko neurriak hartzeko eskatuko dio. Fukushimako (Japonia) ezbeharraren ondotik, Europako zentral nuklearrak aztertzen aritu dira kontinenteko adituak.
Txostena egunotan osatzen ari dira. Efe albiste agentziak eman du azterlan horren zirriborroaren berri. Haren arabera, erreaktoreari eusteko sistemaren aireztatze iragazkiak ere jarri beharko ditu Garoñako zentralak, segurtasuna hobetzeko. Eguraldi baldintza okerretarako ere —euri erauntsiak eta muturreko tenperaturak— plan bereziak diseinatzeko eskatuko die Europak zentral nuklearrei. CSN Espainiako Segurtasun Nuklearrerako Kontseiluari ere zeregina jarriko dio: istripuen kudeaketari buruzko irizpideak eranstea segurtasun gidaren barruan.
