Garoña ixtea ezinbestekotzat jo du Ezker Anitzak

Energia kontuak izan zituen atzo hizpide Ezker Anitzak. Arabako hautagaiak, Victor Fernandezek, Garoñako zentral nuklearra (Burgos, Espainia) ixteko eskatu zuen; Arabatik oso hurbil dago. Fernandezen hitzetan, «zaharkituta» dago zentrala; areago, gogorarazi du Fukushiman (Japonia) ezbeharra izan zuenaren berdina dela. «Energia atomikoak ez dauka soluziorik sortzen dituen segurtasun arazoentzat eta hondakinentzat». Garoña itxi eta inguru hori berritzea ezinbestekoa dela nabarmendu du hautagaiak.

Araban gasa lurpetik ateratzeko proiektu bat iragarri du oraindik orain Eusko Jaurlaritzak, eta hori auzitan jarri du Ezker Anitzak. «Ingurumenarentzat eragin oso txarrak dauzka, eta arrisku handiak». Gainera, Arabako kasuan dirua atzerriko enpresek egingo luketela gogoratu du.

Horiek bazter utzi, eta energia iturri berriztagarriak sustatu behar direla esan du Fernandezek, eta aurreztera jo beharra dagoela.