Gas leherketa izan da Arrasateko etxe batean, baina bizilagunak onik atera dira

Gaur arratsaldean gas leherketa gertatu da Arrasateko (Gipuzkoa) Garagartza auzoko etxe batean, baina ez da zauriturik izan. Bizilagunak eztanda izan baino lehenxeago irten dira familia bakarreko etxetik. Goizean ere izan da gas leherketarik, Irungo Soroxarta industriagunean, baina kalte material handiez gain, ez da inor zauritu. Handik kilometro gutxira, Hondarribian, etxe batean istripuz piztutako suteagatik sei lagun eraman dituzte Bidasoaldeko erietxera, kea arnasteagatik, baina ordu gutxira etxerako bidean ziren berriz.

Gutxigatik ez ditu harrapatu gas bonbona baten leherketak Arrasateko Garagartza auzoko familia bakareko etxe bateko bizilagunak. Argindar barik zeuden, eta kanpin gas bonbona txiki bat erabili dute bazkaria prestatzeko. Horretan zihardutela, gas isuria zegoela ohartu dira, eta badaezbada ere, kalera atera dira. Orduantxe jazo da leherketa. Sukaldea suntsituta geratu da, eta etxearen aurrealdea belztuta, baina ez da inor zauritu.

Hondarribia eta Irungo suteak

Bi sute izan dira gaur Hondarribian eta Irunen. Hondarribikoan sei lagun erietxera eraman behar izan dituzte, baina handik ordu batzuetara ospitala uzteko moduan ziren. Irungo Soroxarta industriagunean izandakoa, eguerdi parterako itzali dute.

Goizean, 7:25ean, piztu da sua Hondarribiko Jaizkibel kaleko etxebizitza batean. Lanpara batek eragin du sua, iturri ofizialen arabera. Sei lagun, haietako bat ertzaina, Irunen dagoen Bidasoaldeko Ospitalera eraman behar izan dituzte, kea arnasteagatik. Handik ordu batzuetara erietxea uzteko moduan ziren.

Zauritutako lau etxebizitza horretan bizi dira, eta bestea haiek laguntzera joan den bizilaguna. Seigarrena ere laguntzen ari zitzaiela sentitu da ondoezik, haiek bezala kea arnastuta.

Beste sutea, Irungo Anaka auzoko Soroxarta industriagunean izan da (Soroxarreta baserria zegoen tokitik gertu), eta pabilioi batek kalte material handiak izan ditu.

7:15ean piztu da sua. Kalte handiak izan dituen pabilioiaz gainera, kalte txikiagoak izan dituen etxabe bat -karrozeria- eta ibilgailu bat ere atzeman ditu.

Gasaren bidean leherketa txiki bat izan da. Ez dakite sua leherketak eragin duen, edo alderantziz gertatu den.

Suhiltzaileek eguerdi parterko itzali dute sua. Sutearen arrazoiak argitzeko ikerketa egiten ari dira. Eusko Jaurlaritzako Barne Sailak adierazi du itxuraz ez dela nahita eragindakoa izan.