Judimendin izandako eraso matxista salatzeko, elkarretaratzea egingo dute bihar, 20:30ean, San Juan eliza aurrean. Erasorik ez, erantzunik gabe leloa aterako dute, eta, horrekin, adierazi nahi dute ez dutela inolako eraso matxistarik onartuko, "ez Judimendin, ez inon".
"Indarkeria matxista, estrukturala den heinean, bizi garen gizarte heteropatriarkala errotik aldatu arte, ez da desagertuko", adierazi dute Gasteizko Mugimendu Feministak, Judimendiko Auzo Elkarteak eta Gazte Asanbladak. Bitartean, uste dute ezinbestekoa dela eraso horiek gaitzestea; guztion inplikazioa beharrezkotzat jo dute indarkeriaren kontra borrokatzeko.
