Aurrera doa Korrikaren 18. edizioa, eta beste hiriburu batera heldu da gaur arratsean; Gasteizera, hain justu. Atzoko etapa Nabaskozen hasi eta Nafarroako Erribera zeharkatzen eman eta gero, Araban eta Nafarroa mendebaldean zehar murgildu dira gaur korrikalariak.
Kanpezu, Maeztu eta beste hainbat herritatik igaro dira gaur goizean, eta 18:45 pasatxo zirela Arabako hiriburura heldu da.
Erakunde publikoen hainbat ordezkarik egin dute bat Korrikarekin Arabako hiriburuan, Cristina Uriarte Eusko Jaurlaritzako Hezkuntza eta Kultura sailburuak eta Bakartxo Tejeria Eusko Legebiltzarreko lehendakariak, esaterako.
Patxi Baztarrika Eusko Jaurlaritzako Hizkuntza Politikarako sailburua ere haiekin izan da.
Eusko Legebiltzarrak kilometro bat erosi du aurten, Korrikaren historian aurreneko aldiz.
Arabako Biltzar Nagusietan ordezkaritza duten alderdietako kideek ere lasterka egin dute.
Dagoeneko mila kilometrotik gora egin ditu Korrikak, eta beste 1.500 ditu aurretik. Igandean amaituko da 18. edizioa, Baionan.
